Dështimi i sotëm i seancës së Kuvendit ku ishte paraparë votimi i Projektligjit për ratifikimin e marrëveshjes për shënjimin e vijës kufitare mes Kosovës dhe Malit të Zi, ka shtyrë ambasadorët e huaj që të nisin takime me krerët politik.
Një takim i tillë është duke u zhvilluar edhe sonte, në zyrën e kryetarit të Kuvendit Kadri Veseli.
Siç mëson Telegrafi nga burimet e veta, në këtë takim pos Kadri Veselit po marrin pjesë edhe ambasadori amerikan Greg Delawie, shefja e zyrës së BE-së në Kosovë, Nataliya Apostolova, zëvendëskryeministri Fatmir Limaj, si dhe deputetët e LDK-së Avdullah Hoti e Kujtim Shala.
Sipas të njëjtave burime takimi i cili ka nisur në orën 17:00 ende nuk ka përfunduar.
Në këtë takim po synohet që të arrihet një konsensus për çështjen e Demarkacionit dhe po ashtu se cili raport të hiqet nga votimi.
Kujtojmë se Kuvendi ka vendosur që seanca e cila dështoi të nis sot për ratifikimin e marrëveshjes Kosovë- Mali i Zi, të vazhdojë nesër nga ora 10:00. /Telegrafi/
