Muzeu i Luvrit ka transferuar disa nga xhevahiret e tij më të çmuara në Bankën e Francës, pasi një grabitje e guximshme gjatë ditës javën e kaluar nxori në pah dobësitë në sigurinë e muzeut të famshëm, raporton Reuters.
Sipas raportimeve, transferimi i sendeve të vlefshme nga galeria Apollo, ku ruhen xhevahiret e kurorës franceze, është kryer të premten nën masa të rrepta sigurie dhe në shoqërim të policisë sekrete, transmeton lajmi.net.
Banka e Francës, e cila ruan rezervat e arit të vendit në një kasafortë të madhe 27 metra nën tokë, ndodhet vetëm 500 metra larg Luvrit, në bregun e djathtë të lumit Sena. As muzeu dhe as banka nuk kanë dhënë ende ndonjë koment për ngjarjen.
Grabitësit vodhën tetë vepra arti me vlerë rreth 102 milionë dollarë nga koleksioni i Luvrit më 19 tetor, duke hyrë me forcë në muze gjatë orarit të hapjes përmes një dritareje në katin e sipërm, të cilën e thyen duke përdorur një vinç. Pas grabitjes, ata u larguan me motoçikleta.
Ngjarja ka bërë jehonë në të gjithë botën dhe ka shkaktuar debat në Francë për mangësitë në masat e sigurisë në një nga institucionet më të rëndësishme kulturore të vendit./lajmi.net/
