Ministri i Tregtisë dhe Industrisë, ne Kosovë, Bajram Hasani është i gatshëm të vërë në dispozicion një pjesë të pagës së tij për t’u shlyer gjobën Granit Xhakës dhe Xherdan Shaqirit.
Dy futbollistët shqiptar të Zvicrës u dënuan nga FIFA me 10 mijë franga, pasi festuan golat e tyre me shqiponjë gjate ndeshjes Zvicër-Serbi.
Përmes një postimi në “Facebook” Hasani ka thënë se emocionet që ata u dhanë të gjithë shqiptarëve nuk paguhen me para.
“Nuk paguhen me para emocionet që na i sollën Granit Xhaka e Xherdan Shaqiri, kur festuan me shqiponjë, pas golave të tyre në ndeshjen Zvicër – Serbi. Ata u dënuan vetëm sepse nuk harruan rrënjët e tyre, nuk harruar nga vijnë. Jo se ata nuk i kanë mundësitë financiare për ta paguar një dënim të tillë, por ndjenja e krenarisë që na dhanë me golat e tyre, më bën të ndjehem i obliguar që një pagë timen ta ndajë për pagesën e kësaj gjobe. Vazhdoni djema e na bëni krenar!”, ka shkruar ai.
