Puna në ndërtim në mëngjesin e sotëm i mori jetën një 30 vjeçari nga komuna e Drenasit, i cili ishte duke punuar në një objekt në Fushë Kosovë, shkruan Ndërtimi.info.
Për rastin të cilin e ka konfirmuar edhe Policia e Kosovës, për Ndërtimi.info ka dhënë më shumë detaje kryeinspektori i Punës, Basri Ibrahimi.
Ai, bërë të ditur se i ndjeri është Valon Berisha, punëtor i kompanisë “Timo – Construction”, e cila në këtë projekt po punon për investitorin “Kastrati Grupo”.
Ibrahimi tregoi se si ka ndodhur rasit, sipas informacioneve të para që ka Inspektorati i Punës.
“Sot ka ndodhë një aksident, në orën 07:35 minuta te investitori ‘Kastrati Group’, ndërsa punëkryesi është ‘Timo – Construction’. Punëtori i aksidentuar, fatkeqësisht me fatalitet, është Valon Berisha, i lindur në vitin 1988 nga komuna e Drenasit. Sipas informacioneve të para gjatë çmontimit të parmakëve të skeleve, punëtori ka rënë nga lartësia”, tha ai.
Tutje, ai theksoi se për shkaktarin e vdekjes dhe sa ka qenë fajtor kompania do të dihet pasi inspektorët ta punojnë raportin përfundimtar të ngjarjes.
Ndërtimi.info kontaktoi me Besnik Lekun nga kompania “Timo – Construction”, mirëpo nuk pranoi të fliste për rastin me arsyetimin se ishte i nxënë dhe si rrjedhojë mbylli telefonin./Ndërtimi.info/
