KQZ ka marrë vendim që t’i rikthejë në kandidim ata 87 kandidatë të cilët i decertifikoi, e kjo pas vendimit të Gjykatës Supreme. Ndër të decertifikuarit ishte edhe Zafir Berisha, i cili ka kandiduar për Kryetar të Prizrenit, shkruan Gazeta Express.
Komisioni Qendror i Zgjedhjeve ka anuluar vendimin për decertifikimin e 87 kandidatëve që kanë kandiduar për zgjedhjet lokale pas vendimit të Gjykatës Supreme. Këtë vendim, sot Komisioni Qendror i Zgjedhjeve e mori në mbledhjen e mbajtur.
“Na është kërkuar që të anulohet vendimi për decertifikimin e 87 kandidatëve. Ne do ta zbatojmë vendimin e Gjykatës Supreme çfarëdo qoftë ai. Pas zgjedhjeve rekomandoj të mblidhemi dhe të diskutojmë për ligjet”, tha kryetarja e Komisionit Qendror të Zgjedhjeve, Valdete Daka.
Ndër të decertifikuarit ishte edhe kandidati i Nismës për Prizren, Zafir Berisha, i cili kishte deklaruar se një gjë e tillë ju bë për inate politike.
