Pas zgjedhjes së Veselit si kryetar i Kuvendit, sot votimit të Haradinajt si kryeministër, dhe me Thaçin si president, që nga sot Kosova mund të thuhet se drejtohet nga “UÇK-ja”!
Presidenti, kryeministri dhe kryetari i kuvendit, kanë qenë themelues të Ushtrisë Çlirimtare të Kosovës, kurse pas luftës ata arritën të jenë figurat kyçe politike në vend, shkruan lajmi.net.
Por cili ishte roli i Thaçit, Haradinajt dhe Veselit në UÇK?
Hashim Thaçi në vitin 1997 kishte shpallur krijimin e një formacioni të armatosur politik që më pas do të njihej si Ushtria Çlirimtare e Kosovës, ku më pas do të mbante postin e drejtorit politik në UÇK, nga ku kishte nisur edhe kontaktet e para me përfaqësues të perëndimit deri në konferencën e Rambujesë.
Ramush Haradinaj është ish-udhëheqës i Ushtrisë Çlirimtare të Kosovës. Ai kishte qenë komandant i zonës operative të Dukagjinit. Pikërisht për angazhimin e tij në luftën kundër Serbisë, ai u gjykua dy herë në gjykatën e Hagës. Pas luftës, Haradinaj kishte ushtruar detyrën e zëvendëskomandantit të Trupave Mbrojtëse të Kosovës.
Edhe Kadri Veseli ishte njëri prej themeluesve të Ushtrisë Çlirimtare të Kosovës.Gjatë kohës së luftës, ai ishte emëruar komandant i Shërbimit të Zbulim Kundërzbulimit (G-2) të UÇK-së. Kurse pas fillimit të bombardimeve, kjo njësi do të mbetej burim i vetëm i informacionit për lëvizjen dhe ndodhjen e forave ushtarake serbe në Kosovë. /Lajmi.net/
