Me rastin e shënimit të 20 vjetorit të rënies së Familjes Jashari, komuna e Skenderajt ka dekoruar qytetin dhe sheshet e këtij qyteti, transmeton Drenica Press.
Dekorimet kryesore te komunës së Skenderajt janë bërë në sheshin “Adem Jashari” në Skenderaj.
Kjo ngjarje dedikohet për të nderuar dhe përkujtuar sakrificën e familjes Jashari dhe Komandantit Legjendar Adem Jashari.
Ishte pikërisht Marsi i vitit 1998, ku Serbia bëri sulmin e gjerë të ndërmarrë në Drenicë për të zhdukur Ushtrinë Çlirimtare të Kosovës e koncentroi në Prekaz, në zemrën dhe kokën e UÇK-së, duke i bërë asaj një rrethim të hekurt, i cili rrethim, për fat të mirë, alarmoi tërë botën. Ajo që do të ndodhë në fillimet e marsit të vitit 1998 do të jetë një dëshmi e gjallë për botën e qytetëruar dhe përgjegjësit e saj politike e diplomatike. Në të vërtetë kjo ngjarje kaq e drejtpërdrejtë dhe kaq e fuqishme për nga përmasat e saj të flijimit unikat, të qëndresës e të masakrimit do ta ngrejë çështjen e Kosovës në krye të agjendës botërore.
