Nga sonte në ora 23:59 do të ndalet për operim njësiti B1, sipas një deklarimi të Korporatës Energjetike të Kosovës.
Në njoftimin e lëshuar nga KEK-u thuhet se kjo vjen pas një operimi prej mbi 50 ditësh pa ndërprerje, dhe sipas KEK-ut, është shfaqur nevoja për ndërhyrje në elektrofilter dhe disa sanime të tjera të domosdoshme.
“Ndalja planifikohet të realizohet për të mbrojtur pajisjet dhe teknologjinë nga dëmtime të mundshme dhe për të shmangur ndonjë defekt me përmasa më të mëdha, që do të kishte ndikim në operim dhe mjedis”, thuhet në njoftim.
Në fund shtohet se ekipet e KEK-ut janë në gatishmëri të plotë, dhe sapo të krijohen kushtet e nevojshme, do të fillojnë menjëherë me identifikimin e saktë dhe sanimin e defekteve, me qëllim që njësia të rikthehet në operim sa më shpejt të jetë e mundur dhe të funksionojë më mirë në aspektin mjedisor.
