Në një nga ndeshjet më të zjarrta të javës së tretë në Serie A, Juventus ka dalë fitues ndaj Interit me rezultat dramatik 4:3, duke e siguruar fitoren e tretë radhazi dhe duke ngjitur në kuotën e plotë prej 9 pikësh.
Bardhezinjtë kaluan në epërsi që herët me golin e L. Kelly në minutën e 14-të, pas një asisti nga Bremer.
Interi barazoi në minutën e 30-të përmes një goditjeje precize nga Hakan Calhanoglu. Por talenti turk i Juventusit, Kenan Yildiz, riktheu epërsinë në minutën e 38-të, sërish pas një asistimi të dytë nga Bremer, transmeton lajmi.net.
Pjesa e dytë solli edhe më shumë emocione. Calhanoglu barazoi sërish për Interin në minutën e 65-të, ndërsa Marcus Thuram përmbysi rezultatin në të 76-ën, duke e kaluar Interin për herë të parë në avantazh.
Por Juventusi nuk u dorëzua. Khephren Thuram, në një skenar ironik ku përballej me vëllain e tij Marcus, barazoi në minutën e 83-të pas një asisti të shkëlqyer nga Yildiz.
Kur ndeshja po shkonte drejt barazimit, V. Adzic shënoi në minutën 90+1 pas një pasimi nga J. David, duke i dhënë fitoren spektakolare “Zonjës së Vjetër”.
Pas kësaj fitoreje, Juventus kryeson me 9 pikë të plota, ndërsa Interi, me vetëm një fitore nga tri ndeshje, mbetet me 3 pikë dhe përballet me presion të rritur në javët në vijim./lajmi.net/
