Ish-diplomati amerikan paralajmëron se sinjalet e përziera mund t’i dobësojnë sanksionet ndaj Rusisë

Shtetet e Bashkuara kanë kompetenca të reja për të rritur presionin ekonomik ndaj Rusisë, por ndikimi i tyre do të varet nga fakti nëse administrata e Donald Trumpit i përdor ato në mënyrë të qëndrueshme dhe e bën të qartë se çfarë kërkon nga Moska dhe qeveritë e tjera, tha për Radion Evropa e Lirë ish-diplomati amerikan Daniel Fried.

“Administrata duhet të ndalojë së dërguari sinjale të përziera”, tha Fried në një intervistë më 29 shtator, duke argumentuar se ligji i sapomiratuar për sanksionet ndaj Rusisë mund t’i sigurojë Uashingtonit një mjet të rëndësishëm ndikimi ndaj Moskës, nëse zbatohet krahas diplomacisë dhe koordinimit me aleatët e SHBA-së.

Fried, karriera e të cilit në fushën e sigurisë kombëtare përfshiu shtatë administrata amerikane, përfshirë shërbimin si ambasador i SHBA-së në Poloni dhe si koordinator i Departamentit të Shtetit për politikën e sanksioneve, tha se ligji i jep administratës mjete për të goditur të ardhurat e Rusisë nga energjia, si dhe vendet që vazhdojnë të blejnë naftë dhe gaz rus.

“Momenti i duhur është tani”, tha Fried, i cili u pensionua nga Departamenti i Shtetit në vitin 2017.

Fried tha se, po të ishte ende koordinator për sanksionet, do të udhëtonte në vende si Kina dhe India për të diskutuar reduktimin e blerjeve të energjisë nga Rusia, dhe për të negociuar marrëveshje që do të mund të ulnin varësinë e tyre nga Moska.

Ligji “Lindsey O. Graham për Sanksionimin e Rusisë dhe Iranit i vitit 2026”, të cilin presidenti Donald Trump e nënshkroi më 18 shtator, synon zyrtarët rusë, bankat, sektorin energjetik dhe anijet e lidhura me të ashtuquajturën “flotë në hije” të Rusisë, që përdoret për të shmangur sanksionet ndaj cisternave të naftës. Ligji gjithashtu i jep administratës autoritetin të vendosë tarifa ndaj vendeve që vazhdojnë të blejnë sasi të konsiderueshme nafte dhe gazi rus.

Ligji nuk është i përsosur, tha Fried, por ofron fleksibilitet të mjaftueshëm për të qenë i dobishëm.

“Unë do të mund ta bëja dhe, nëse mund ta bëja unë, mund ta bëjë edhe dikush tjetër”, tha ai.

“Ajo që duhet të bëni është që ai ligj të ulë të ardhurat e [presidentit rus, Vladimir] Putinit nga shitjet e naftës dhe gazit”, tha Fried. “Nëse e bëni këtë, atëherë keni arritur diçka”.

Fried tha, gjithashtu, se sanksionet mund të ndikojnë në mënyrë të tërthortë ndaj Rusisë duke e detyruar atë ta shesë naftën me një zbritje më të madhe. “Nëse e bëjnë këtë, çdo dollar që nuk e fitojnë është sukses për ligjin”, tha ai.

Por, Fried tha se ligji do të kishte efekt të kufizuar nëse sinjale të tjera nga Uashingtoni do të sugjeronin se administrata është më e shqetësuar për mbajtjen e furnizimeve ruse me energji në tregjet globale sesa për reduktimin e të ardhurave të Moskës.

Ai iu referua komenteve të Trumpit se sulmet ukrainase ndaj rafinerive ruse po kontribuonin në rritjen e çmimeve të naftës dizel. “Kjo dërgon një sinjal të përzier se ne në të vërtetë duam të shohim më shumë naftë dhe dizel rus në treg, dhe jo më pak”, tha Fried.

“Këto sinjale të përziera nga Uashingtoni e dobësojnë ligjin, por, më e rëndësishmja, e dobësojnë politikën e mirë”, shtoi ai.

Test i ri për politikën e Uashingtonit ndaj Rusisë

Komentet e Fried erdhën në kohën kur raportet e reja sugjeronin një zgjerim të mundshëm të diskutimeve ekonomike SHBA-Rusi, krahas përpjekjeve diplomatike për t’i dhënë fund luftës së Rusisë kundër Ukrainës.

The Atlantic raportoi se i dërguari i posaçëm amerikan, John Coale, ka propozuar një plan sipas të cilit Rusia mund të lirojë të burgosur politikë në këmbim të lehtësimit të disa sanksioneve. Sipas raportimit, propozimi është bërë për herë të parë disa muaj më parë dhe mbetet në një fazë të hershme.

Nisma potencialisht mund t’i hapë rrugë rifillimit të angazhimit ekonomik SHBA-Rusi, ndërsa lufta vazhdon, raportoi The Atlantic.

Departamenti i Shtetit nuk ka komentuar publikisht për raportimin.

Coale ka ndjekur një qasje të ngjashme me Bjellorusinë, e cila ka liruar rreth 500 persona që konsiderohen të burgosur politikë në këmbim të lehtësimit të sanksioneve. Uashingtoni gjithashtu ka nisur diskutime me Bjellorusinë për zgjerimin e lidhjeve ekonomike, përfshirë një blerje të mundshme amerikane të potasit bjellorus.