Drita të premten ka mësuar kundërshtarët për fazën e ligës së Conference League, ku u kualifikuan për herë të parë në histori.
Kampioni i Kosovës për kundërshtar do të ketë skuadrat si AZ Alkmar, Rayo Vallecano, Omonia, Kups, Shkëndija dhe Shelbourne.
Në një intervistë ekskluzive për IndeksOnline, Drejtori Sportiv i Dritës, Valon Zymberi ka komentuar shortin e Conference League.
Ai tha se do të shfrytëzojnë çdo mundësi dhe nga secila ndeshje do të mundohen të marrim maksimumin.
‘’Po, e kemi pa shortin dhe mendoj që do të kemi ndeshje atraktive dhe mendoj që nga këto ndeshje nuk kem se çfarë të humbim, por nga secila ndeshje do të mundohemi të marrim maksimumin dhe nga këto ndeshje të përfitojmë dhe të rritemi në çdo aspekt. Do ta shfrytëzojmë çdo mundësi që na jepet.’’, ka deklaruar Zymberi.
Ndeshja e cila ka marrë vëmendjen padyshim është ajo kundër Shkëndijës, e cila zhvillohet në stadiumin ‘’Fadil Vokrri’’ në Prishtinë.
Zymberi tha se kjo do të jetë një natë fantastike, ku do të mbledh të gjithë shqiptarët në kryeqytetin e Kosovës.
‘’Që në shortin e parë për kualifikueset në raundin e parë të Chempions League, mundësia për tu përballur me Shkëndijën ka qenë e mundur dhe ja që fati deshi të takohemi në grupet e kompeticionit. Do të jetë një natë fantastike ku mund te mblidhen të gjithë shqiptarët për një natë festive kudo qe janë ne kryeqytetin e Kosovës.’’, deklaroi ai për IndeksOnline.
Zymberi po ashtu tha se skuadra e Dritës do të mundohet në ditët e fundit të merkatos të sjellë ndonjë përforcim të ri, duke shqyrtuar edhe mundësitë që ofron tregu.
‘’Përderisa afati kalimtare është i hapur ende, jemi të hapur dhe po shohim me kujdes nëse tregu ofron diçka që për ne do të ishte e mirë.’’, deklaroi Valon Zymberi./IndeksOnline/
