Agim Ademi ka marr dy urime speciale pas rizgjedhjes edhe për një mandat në krye të FFK-së.
Presidenti i FIFA-s, Gianni Infantino dhe ai i UEFA-s, Aleksander Çeferin, i kanë dërguar Agim Ademit letra urimi, shkruan IndeksOnline.
Letra e Gianni Infantinos:
I nderuar President,
Ju lutem pranoni përshëndetjet e mia më të përzemërta dhe urimet më të sinqerta për rizgjedhjen tuaj si President i Federatës së Futbollit të Kosovës.
Do t’ju isha mirënjohës nëse do të përcillnit gjithashtu urimet e mia edhe për anëtarët e Komitetit Ekzekutiv të zgjedhur së bashku me ju, ndërsa shfrytëzoj këtë rast për t’ju falënderuar për të gjitha përpjekjet tuaja, punën dhe kontributin tuaj të rëndësishëm në zhvillimin e sportit tonë dhe në promovimin e vlerave të tij në Kosovë.
Ju dërgoj juve dhe ekipit tuaj urimet më të mira për këtë mandat të ri dhe ju uroj çdo sukses në të gjitha sfidat që ju presin. Pres me kënaqësi, i nderuar President, të vazhdojmë bashkëpunimin tonë për rritjen dhe prosperitetin e futbollit në Kosovë në vitet në vijim.
Me respekt sportiv,
Gianni Infantino
Letra e Aleksander Çeferin:
I nderuar Z. President, i dashur Agim,
Kam kënaqësinë t’ju përcjell urimet e mia për rizgjedhjen tuaj sot si President i Federatës së Futbollit të Kosovës.
Rritja dhe zhvillimi me një ritëm shumë të qëndrueshëm janë qartësisht të dukshme në futbollin e femrave – dhe në futbollin e meshkujve, për herë të parë, së shpejti do ta shohim kombëtaren të garojë në ndeshjet “play-off” për një vend në Kupën e Botës, duke shënuar një moment shumë të veçantë në kohë për futbollin në Kosovë.
Ju uroj gjithë të mirat, Agim, teksa hyni në kapitullin e ardhshëm emocionues që ju pret.
Me respekt të sinqertë,
UEFA
Aleksander Čeferin
President
