Ratifikimi i Marrëveshjes së Demarkacionit me Malin e Zi doli të jetë problemi më i madh i qeverisjes së kaluar PDK-LDK, i cili u bë shkak i prishjes së koalicionit. Kjo solli modelin e paparë deri asokohe në Kuvendin e Kosovës – hedhjen e gazit lotsjellës. Zhvillimet e tilla u bënë temë qendrore edhe në mediet ndërkombëtare.
Ndonëse ishte partneri i koalicionit PDK që e prishi koalicionin, megjithatë, brenda kësaj partie u zhvilluan drama të mëdha.
Nënkryetari i PDK-së, Enver Hoxhaj tregon për herë të parë për FaktePlus, përplasjet brenda partisë për Marrëveshjen e Demarkacionit.
Hoxhaj tregon me emër “besnikët” e partisë për këtë marrëveshje. Enver Hoxhaj, Xhavit Haliti dhe Fatmir Xhelili ishin tre emrat e partisë që po e mbronin versionin e Demarkacionit të cilin e kishte nënshkruar ish-shefi i tyre, Hashim Thaçi.
“Shembull, para dy viteve kemi pasur dallime për demarkacionin. Vetëm Xhavit Haliti, Fatmir Xhelili dhe unë kemi mbetur, pasi ka shkuar Thaçi, duke mbrojtur versionin e demarkacionit që në fund e votuan të gjithë. Kur mblidheshim në PDK vetëm ne tre kemi qenë të izoluar në proces dhe në fund e kanë votuar krejt”, ka thënë Hoxhaj.
Ndër tjera, Hoxhaj tregon edhe mosmarrëveshjet me deputetët e PDK-së që vinin nga zona e Dukagjinit. Tek ata ishte krijuar përshtypja se askujt s’po u dhimbsen majat e Çakorrit dhe Zhlepit.
“Një pjesë e kryesisë ka pasur mendim tjetër, ndërsa një pjesë e deputetëve që vinin nga Dukagjini mendonin se neve na dhimbet me pak maja e Çakorrit dhe Zhlebit, se unë jam nga Prizreni dhe mund të kem lidhshmëri më shumë për një bjeshkë kah Shqipëria sesa në raport me Malin e Zi”, ka theksuar ai.
Hoxhaj ka thënë se të tilla dallime ka edhe aktualisht brenda PDK-së, por ka mohuar se ka përçarje të brendshme, duke thënë se kanë nisur një proces të brendshëm zgjedhor që synon reforma dhe riorganizim të partisë.
