Shkruan Faruk MUJKA
Sot i mbarë qyteti bashkëndjeu dhe ndau dhimbjen me familjen Kamberaj e cila humbi më të shtrenjtin djalin e tyre Ermalin. Sot ishte atmosferë morti dhe qetësi frikësuese në qytetin e Mitrovicës. Gjoksi të shtrëngohej nga dhimbja por edhe nga zemërimi kur e sheh se në çfarë gjendje është katandisur shoqëria jonë e me të së bashku edhe qyteti ynë i cili gjithmonë ka qenë i njohur për bujarinë, durimin dhe zemërgjerësinë. Në vend të saj po tenton të shëndrrohet para syve tonë të përgjumur dhe gojës së mbyllur në qytet ku kapadahinjtë, uzurpatorët e harbutët e krijojnë vetë ligjin dhe luajnë me rregullat e tyre të ndyra.
Kjo vdekje e parakohshme e Ermalit që do të jetë përjetësisht njollë e shoqërisë sonë, ky zemërim i akumuluar në gjokset tona dhe ky bashkim e solidaritet i treguar sot nuk guxon të humb kot. Duhet të na prek ndërgjegjën në baza ditore dhe të kërkojmë me ngulm por edhe vetë të kontribojmë në sundimin e ligjit, në sundimin e barazisë, në sundimin e drejtësisë.
Po foli,i zhveshur nga petku partiak apo institucional por duke mos i ikur përgjegjësisë as nga këto pozicione. Tek e fundit të gjithë jemi banorë të Mitrovicës
Të kërkojmë nga të gjitha institucionet që ti kryejnë deri në fund dhe me përgjegjësinë më të madhe detyrat e tyre por edhe ne të kujdesemi që të mos flasim për moral e veprat tona të jenë e kundërta e saj.
Le të jetë vdekja e Ermalit pika ku harbutëria kriminale mposhtet nga qytetaria aktive. Le të jetë Ermali sinonim i lufës së dritës ndaj errësirës. Vetëm kështu mund ti dalim hak Ermalit dhe ti ndihmojmë familjes së tij që ta përballoj këtë humbje të papërshkrueshme.
Qoftë i përjetshëm kujtimi për Ty, Ermal.
