Kryeministri i Kosovës, Ramush Haradinaj po qëndron për vizitë zyrtare në Vatikan, atje është pritur nga sekretari i shtetit, Kardinali Pietro Parolin. Nga njoftimi që kryeministri ka bërë në Facebook thotë se njohja e pavarësisë së Kosovës nga Vatikani është hap i nevojshëm.
“Kosova është në kërkim të partneritetit diplomatik me shtetin e Vatikanit dhe për këtë, njohja nga Selia e Shenjtë është hap i nevojshëm”, shkruan Kryeministri, transmeton Express.
Tutje ai thotë se liria fetare dhe orientimi ynë euro-atlantik janë vlera të pacenueshme.
“Shteti i Kosovës është faktor i rëndësishëm i paqes dhe i stabilitetit si dhe promovuese e fqinjësisë së mirë.
Vizita e sotme dhe pritja zyrtare nga Kardinali Parolin është dëshmi e orientimit tonë, drejt vendosjes së partneritetit strategjik me Vatikanin”, është shprehur Haradinaj.
Ai ka theksuar se ka pasur pritje tëngrohtë në Selinë e Shenjtë, nga Sekretari i shtetit, Kardinali Pietro Parolin.
“Kardinalit Parolin, i shpreha përkushtimin e vendit që të ruajmë dhe avancojmë marrëdhëniet tona, derisa Eminenca e Tij, na inkurajoi për rrugën tonë euro-atlantike”, thotë Haradinaj.
