Anëtarja e LDK-së, Sibel Halimi, ka reaguar ndaj intervistës së djeshme të Glauk Konjufcës, duke thënë se ai dukej sikur fliste nga një realitet paralel dhe jo nga ai që, sipas saj, e ka ndërtuar vetë bashkë me Lëvizjen Vetëvendosje.
Halimi ka vlerësuar se deklaratat e Konjufcës përbëjnë një përpjekje të vonuar për të arsyetuar pasojat e një qeverisjeje që, sipas saj, ka prodhuar më shumë dëme sesa reflektim, raporton lajmi.net
“Edhe më i vonuar është korrigjimi i një diskursi që ka ushqyer polarizim, urrejtje e armiqësi”.
Në një postim në Facebook, Halimi ka theksuar se distancimi i Konjufcës nga vetvetja dhe nga subjekti politik që përfaqëson nuk përbën akt guximi.
“Distancimi nga vetvetja dhe nga subjekti politik që e përfaqëson, nuk është akt guximi, por shenjë paniku që historia e tyre po mbyllet me turp!”
Ajo ka shtuar se përgjegjësia politike nuk mund të shmanget përmes shfajësimit.
“Sepse në politikë, si në histori, shfajësimi nuk e zhbën rrugën e ndërtuar, dhe as përgjegjësinë për realitetin që ka marrë formë. Prandaj, të mos pretendohet se në politikë mendimi i tij qëndron i ndarë nga pushteti që ka ushtruar”.
Në fund, Halimi ka vlerësuar se ky është vetëm një qëndrim tjetër i qëllimshëm.
“Është vetëm një qëndrim i radhës, i krijuar në laboratorin e VV-së për të manipuluar.”/Lajmi.net/
