Ish-kryetari i Partisë Demokratike të Kosovës, Kadri Veseli, është liruar për vizitë nga Haga ku po mbahej në paraburgim si i dyshuar për krime lufte.
Angela Griep, zëdhënëse e Dhomave të Specializuara ka konfirmuar për Reporterin se Veseli është liruar për arsye familjare, por ka thënë se ai mbetet në paraburgim.
“Për arsye personale Gjyqtari i Procedurës Paraprake ka udhëzuar zyrën e regjistrimit të menaxhojë një vizitë kujdestare për [Kadri Veselin] në Kosovë për të takuar familjen e ngushtë. I akuzuari mbetet në paraburgim. EULEX dhe Policia e Kosovës po mbështesin Dhomat e Specializuar në këtë vizitë”, ka deklaruar Griep për Reporteri.net.
Veseli sipas mediave lokale në Mitrovicë e ka babanë e tij në gjendje të rëndë shëndetësore dhe ndodhet i shtrirë në spital.
Veseli po ruhet nga forcat e shumta policore vendore dhe ato të EULEX-it.
Gazeta Online “Reporteri.net” ka tentuar ta marrë një përgjigje nga deputeti i PDK-së në Mitrovicë, Bedri Hamza, por ai nuk i është përgjigjur thirrjeve telefonike.
