Sulmuesi i Atletico Madridit, Antoine Griezmann, duket se do të qëndrojë në klub deri në fund të sezonit, ndonëse më parë ishte në tavolinë një transferim drejt Major League Soccer.
Veterani francez 34-vjeçar pritet të largohet nga “Metropolitano” këtë vit, por duket se Diego Simeone dhe drejtuesit e Atleticos e kanë bindur të mos largohet ende.
Griezmann nuk e ka fshehur dëshirën për t’u transferuar në Shtetet e Bashkuara për fazën e fundit të karrierës së tij.
Golashënuesi më i mirë në historinë e Atleticos kishte një ofertë për t’iu bashkuar Orlando City si lojtar i kategorizuar (Designated Player).
Klubi amerikan kërkonte që ai të pranonte ofertën para 26 marsit, çka do të nënkuptonte largimin e tij para fundit të sezonit nga “Los Colchoneros”.
Megjithatë, nuk është e garantuar që oferta do të mbetet e vlefshme edhe në verë, pasi mund të synojnë alternativa të tjera.
Sipas “ESPN”, Griezmann ka vendosur ta shtyjë largimin nga Atletico, pas kualifikimit në finalen e Kupës së Mbretit kundër Barcelonës të martën mbrëma.
Kjo i jep atij mundësinë të fitojë një tjetër trofe të madh me Atletico Madridin, përveç Ligës së Evropës të vitit 2018. Finalja do të luhet më 18 prill në Sevilje dhe Atletico konsiderohet favorit i madh.
Pavarësisht moshës, Griezmann mbetet një lojtar kyç për Simeone.
Ai ishte titullar në të dy gjysmëfinalet kundër Barcelonës dhe konsiderohet si një nga më të mirët në përballje, duke shënuar edhe në ndeshjen e parë.
Atletico duket se po përqendron forcat në Kupën e Mbretit dhe Ligën e Kampionëve për pjesën e mbetur të sezonit, duke qenë tashmë shumë pranë një trofeu./GazetaExpress/
