Pas vizitës së presidentit ukrainas Volodomyr Zelensky në Berlin, kancelari gjerman Friedrich Merz ka njoftuar se Berlini do të ndihmojë Kievin edhe me financim të internetit Starlink të Elon Musk.
Përmes një postimi në rrjetin social X, Merz ka thënë së në mënyrë që Ukraina të mbrohet nga agresioni rus, vendi do ta ndihmojë me internet e poashtu me zhvillim të armëve me rreze të gjatë.
“Në mënyrë që Ukraina të mund të mbrohet kundër agresionit rus, ne po financojmë një pjesë të konsiderueshme të mbulimit me Starlink. Duam të blejmë së bashku sisteme armësh me rreze të gjatë, të prodhuara në Ukrainë. Nuk do të ketë kufizime në rreze,” është shprehur Merz.
Kujtojmë se në shkurt të vitit 2023, SpaceX i Elon Musk, kufizoi përdorimin e rrjetit satelitor Starlink në Ukrainë, duke ndaluar veçanërisht përdorimin e tij në operacionet me dronë. Elon Musk deklaroi se kjo masë u mor “për të shmangur Luftën e Tretë Botërore.” Këto kufizime më pas u hoqën, megjithatë pas rikthimit të Donald Trump në presidencë, kërcënimet nisën sërish me zyrtarë të administratës Trump që thuhet se kanë paralajmëruar Ukrainën se do të ndërpresin qasjen në Starlink nëse Kievi nuk pranon një marrëveshje për shfrytëzimin e mineraleve.
Sipas raportimeve aktualisht në Ukrainë ndodhen mbi 150 mijë terminale Starlink, të cilat gjenerojnë rreth 15 milionë dollarë në muaj nga tarifat e abonimit. Kjo shifër e konsiderueshme tregon se ndonëse përdorimi i teknologjisë ka përmasa strategjike në luftë, ai përfaqëson gjithashtu një interes të rëndësishëm financiar për SpaceX.