Disa prindër kanë alarmuar në rrjetet sociale se kopshtet kanë marr masa kundër sëmundjes së fruthit.
Ata kanë treguar sesi çerdhet nuk po i pranojnë fëmijët të cilët nuk kanë marr vaksina kundër këtij virusi, shkruan Gazeta Shneta.
Këto masa të kopshteve kanë ardhur pasi disa prindër po refuzojnë vaksinimin e fëmijëve, nga frika se shkakton autizmin.
Një gjë të tillë e kanë mohuar mjekët kosovarë, por edhe studime të instituteve në SHBA, pohojnë se vaksina kundër fruthit nuk shkakton autizëm.
Drejtoresha e Akademisë së Fëmijëve “Loja”, Haxhere Deshishku, thotë se nuk kanë pasur asnjë rast të sëmundjes së fruthit, mirëpo kanë insistuar te prindërit që t’i vaksinojnë fëmijët.
“Ne i kemi 130 fëmijë në kopësht, por nuk kemi asnjë rast me fruth. Megjithatë, ne do t’i mbajmë të informuar prindërit për sëmundjen e fruthit”, ka deklaruar Deshishku.
Ajo ka shtuar se në “Loja” nuk pranohen fëmijët që nuk janë të vaksinuar.
“Ne e kemi edhe në kontratë dhe nuk i pranojmë fmëijët që nuk janë të vaksinuar kundër sëmundjeve ngjitëse”, ka thënë Deshishku.
Drejtori i Klinikës Infektive në QKUK, Dr. Hamdi Ramadani, iu ka bërë thirrje prindërve që të vaksinojnë fëmijët, ndërsa ka treguar se janë ndërmarr masa për parandalimin e përhapjes së sëmundjes në institucionet shkollore.
“Janë ndërmarr masa të parandalimit të sëmundjes, në shkolla e çerdhe. Jemi në kontakt me të gjitha qendrat e mjekësisë familjare dhe spitalet rajonale”, ka deklaruar ai.
Sëmundja e fruthit deri më tani ka prekur mbi 150 persona në Kosovë. Dy prej tyre, një fëmijë 15 muajshe dhe një 37 vjeçar kanë ndërruar jetë.
