Sot në të gjitha institucionet publike dhe private të arsimit parauniversitar do të fillojë procesi mësimor 2025/2026.
Deputetja nga radhët e Partisë Demokratike të Kosovës (PDK) Ariana Musliu-Shoshi ka uruar të gjithë nxënësit, për një fillim të mbarë të vitit të ri shkollor.
Por ka thënë se për fat të keq, arsimi në Kosovë po shndërrohet në një barrë të rëndë financiare për prindërit, pasi që subvencioni prej 80 euro nuk mjafton as për librat bazë dhe se çmimet janë të papërballueshme. Musliu- Shoshi thotë se librat për nxënësit vazhdojnë të shiten madje me dy çmime të ndryshme.
E për këtë gjendje sipas saj përgjegjëse është qeveria aktuale e udhëhequr nga Kurti, e cila tash e pesë vite nuk ka arritur të sigurojë libra falas për nxënësit dhe as të garantojë kushte dinjitoze për arsim.
“Për këtë gjendje është përgjegjëse qeverisja aktuale e udhëhequr nga Kurti, e cila tash e pesë vite nuk ka arritur të sigurojë librat falas për nxënësit dhe të garantojë kushte dinjitoze në arsim. Arsimi nuk është privilegj por është e drejtë themelore, të cilën kjo qeveri po e mohon dhe po e shkel çdo ditë. Fëmijët tanë meritojnë më mirë!”, ka shkruar Musliu-Shoshi në Facebook.
