Zëvendëskryeministri i Kosovës, njëherësh partner i koalicionit aktual qeverisës, Fatmir Limaj, nuk mori pjesë sot në mbledhjen e Qeverisë ku Presidenti Hashim Thaçi po raportonte për takimin e së dielës me Aleksander Vuçiq në Bruksel.
Zëvendëskryeministri Fatmir Limaj nuk ka marrë pjesë në mbledhjen e Qeverisë ku ka raportuar Presidenti Hashim Thaçi për takimin e së dielës që shkoi në Bruksel.
Thaçi është ulur afër Haradinajt ndërkohë që afër tyre ka qenë Behgjet Pacolli i cili të dielën e ka shoqëruar Thaçin në Bruksel në takimin me palën serbe.
Sidoqoftë, në këtë mbledhje Thaçi u bëri thirrje të gjithë liderëve nga pozita e opozita që të bashkohen për të themeluar ekipin negociator që do ta udhëheqë fazën përfundimtare të dialogut Kosovë-Serbi. Epilogu i së cilës pritet që dy vendet ta njohin njëri-tjetrin. Por, siç dihet zyrtarë të NISMA’s disa herë kanë deklaruar se janë kundër Thaçit si prijës i këtij procesi.
Ndryshe Thaçi ka folur me tone më të buta. Për dallim nga konferenca e së enjtes ku ka thënë se Kosova mund të mbetet si Palestina nëse nuk shkon në negociata me Serbinë duke theksuar se nuk ka as vija të kuqe në këtë proces.
Në Qeveri, ai tha se pala kosovare do të bëjë kompromise minimale./Gazeta Express
