Në mbledhjen e parë me kabinetin e tij qeveritar, si kryeministër i Kosovës, Ramush Haradinaj ka propozuar shkarkimin e përbërjes së Komisionit shtetëror për shënjimin dhe mirëmbajtjen e kufirit shtetëror, kryetar i të cilit, ka qenë Murat Meha.
Kabineti qeveritar kanë votuar propozimin e kryeministrit Haradinaj dhe ka marrë vendimin për shkarkimin e këtij komisioni, shkruan Periskopi.
Në arsyetimin e tij për shkarkimin e këtij kommisioni, Haradinaj ka thënë se edhe ashtu ‘Komisioni ka pasur afatin e skaduar’. Për kryetar të këtij komisioni, Haradinaj e ka propozuar Shpejtim Bulliqin.
“Ky komision, edhe ashtu e ka pasur afatin e skaduar. Është dashur të krijohet një komision i ri. Unë sot jam konsultuar edhe me partnerët politik. I propozoj qeverisë shkarkimin e këtij komisioni, sot. Njëkohësisht edhe ta votojmë komisionin e ardhshëm, por atëherë kur ta kemi të gatshëm. Ju njoftoj se i kam kërkuar dhe besuar udhëheqjen e këtij komisioni, profesor Shpëtim Bulliqit, i cili do ta merrte përsipër që ta krijuar një komision”, ka thënë Haradinaj.
Por për këtë vendim, është i habitur vetë kryetari i Komisionit Murat Meha, duke thënë se ‘në fakt, Komisioni e ka përfunduar misionin e vet që moti’.
‘Kjo ka qenë e habitshme për mua dhe Komisionin pasiqë misioni ynë tashmë veç ka përfunduar dhe nuk e di pse duhet të shkarkohet një Komision i cili ka përfunduar detyrën e tij. Më tepër nuk kam çka të them lidhur me këtë madje as që dua të merrem me këtë çështje sepse kemi shumë punë tjera për të bërë”, i ka thënë Meha Periskopit.
Ndryshe, si kryetar i Komisionit Shtetëror për caktimin e vijës kufitare të Kosovës me Malin e Zi, kishte mbrojtur vendimin që kishte sjellur ky Komision për vijën kufitare, duke thënë se institucioni që përfaqëson ‘nuk e ka ndryshuar për asnjë metër territorin e Kosovës’./Periskopi/
