Ebola në Kongo, Gjermania trajnon personelin shëndetësor për të parandaluar përhapjen e virusit
Gjermania ka intensifikuar mbështetjen për luftimin e epidemisë së Ebolës në Republikën Demokratike të Kongos, duke trajnuar mjekë dhe infermierë për trajtimin e sigurt të pacientëve dhe parandalimin e infektimit të personelit shëndetësor. Deri më tani, shpërthimi është shoqëruar me rreth 9 mijë raste infektimi dhe 4 mijë vdekje.
Sipas Euronews Health, ekipet gjermane po zhvillojnë trajnime në Republikën Demokratike të Kongos, Ugandë dhe Kenia, me synimin që profesionistët shëndetësorë të jenë të përgatitur për trajtimin e pacientëve me Ebola dhe për kufizimin e përhapjes së virusit.
Trajnimet përqendrohen në përdorimin e pajisjeve mbrojtëse, procedurat e trajtimit dhe masat që duhet të ndërmerren për të shmangur infektimin gjatë kujdesit ndaj pacientëve.
Louise Götze, infermiere e kujdesit intensiv në spitalin Charité në Berlin, ka marrë pjesë disa herë këtë vit në misione trajnuese në rajonin e prekur nga epidemia.
Ajo ka theksuar rëndësinë e përgatitjes së personelit shëndetësor, në mënyrë që trajtimi i pacientëve të kryhet në kushte të sigurta. Sipas raportimit, rreth 200 punonjës shëndetësorë janë infektuar gjatë ushtrimit të detyrës.
Gjermania ndan 21 milionë euro për mbështetje
Ministria gjermane për Bashkëpunim Ekonomik dhe Zhvillim ka rritur mbështetjen për përballimin e epidemisë me 21 milionë euro, përfshirë financimin e pajisjeve mbrojtëse dhe trajnimin e personelit.
Kushtet klimatike në rajonet e prekura e vështirësojnë punën e ekipeve mjekësore. Sipas ekspertëve të cituar nga Euronews, veshjet mbrojtëse mund të përdoren në mënyrë të sigurt vetëm për rreth 45 deri në 60 minuta, ndërsa çdo ditë përdoren më shumë se 10 mijë kostume mbrojtëse, të cilat më pas duhet të asgjësohen për të parandaluar kontaminimin.
Lexo edheRriten rastet e fruthit në Kosovë, IKShPK bën thirrje për vaksinimin e fëmijëve
Për të zvogëluar ekspozimin e punonjësve ndaj rrezikut, po përdoren edhe struktura me barriera transparente, të cilat u mundësojnë profesionistëve shëndetësorë të vëzhgojnë dhe të kujdesen për pacientët pa pasur nevojë të qëndrojnë vazhdimisht të veshur me të gjitha pajisjet mbrojtëse.
Epidemia ende nuk është nën kontroll
Sipas të dhënave të raportuara nga Euronews, epidemia në lindje të Republikës Demokratike të Kongos ka shkaktuar rreth 9 mijë infektime dhe 4 mijë vdekje. Shpërthimi ka prekur edhe vende të tjera të rajonit, ndërsa autoritetet dhe ekipet ndërkombëtare po përpiqen të parandalojnë përhapjen e mëtejshme.
Ekspertët theksojnë se izolimi dhe trajtimi i pacientëve, mbrojtja e personelit mjekësor dhe informimi i komuniteteve janë masa kyçe për kontrollimin e epidemisë.
Mungesa e besimit në institucionet shëndetësore dhe përhapja e keqinformimit paraqesin sfida shtesë, pasi mund t’i bëjnë qytetarët të hezitojnë të kërkojnë ndihmë mjekësore.
Ndërkohë, sipas raportimit, ende nuk ka vaksinë të miratuar kundër variantit Bundibugyo të virusit Ebola, ndërsa një kandidat për vaksinë është në fazën e testimit.
