Blerim Potera, një ish i dënuar për trafikim armesh, përveç miqësive që ka me drejtuesit e burgjeve të Kosovës, deri tek drejtori Sokol Zogaj, ka raporte të afërta edhe me vëllain e Presidentit Hashim Thaçi, Gani Thaçin.
Biznesmeni Blerim Potera, ish i dënuar me vetëm 5 muaj burgim për mbajtje në pronësi, kontroll, posedim ose shfrytëzim të paautorizuar të armëve, si dhe të trafikimit me armë nga neni 328, paragrafi 1 dhe 2, i KPK’së, së fundi është parë në shoqëri me drejtuesit e burgjeve të Kosovës, ku vuajti vetëm 3 nga 5 muajt e dënimit.
Fotografia e tij në darkë me Drejtorin e Burgjeve të Kosovës, Sokol Zogaj, Drejtorin për Siguri i Burgjeve të Kosovës, Burim Buleshkaj, Drejtorin e burgut të Pejës, Isuf Iberdemaj, atë të Sigurisë së Lartë, Rasim Selmani, si dhe gardianin Nazim Zekolli, detyroi Ministrinë e Drejtësisë për të urdhëruar inspektoratin e saj të bëjë inspektim të këtij rasti, e që më pas të ndërmerren veprimet e tjera të duhura.
Por miqësitë e Blerim Poteres janë edhe më të thella. Ai shoqërohet edhe më vëllain e Presidentit Hashim Thaçi, Gani Thaçin. Edhe ky i fundit i njohur si biznesmen.
Gazeta Express ka siguruar një fotografi të një darke ku shihen dy biznesmenit Thaçi e Potera. Me ta është edhe miku i familjes së presidentit, biznesmeni tjetër Milaim Cakiqi.
Fotografia në fjalë është e shkrepur në të njëjtin lokal ku Potera kishte darkuar me drejtuesit e Shërbimit Korrektues të Kosovës, dhe për ironi ndodhen në të njëjtën tavolinë të lokalit.
