Kryetari i Kuvendit, Kadri Veseli i cili ka filluar një vizitë lobuese për liberalizimin e vizave për gjatë kësaj vizite zyrtare ditën e djeshme në Vjenë ka nënshkruar një marrëveshje e cila nuk ka të bëjë me liberalizimin e vizave.
Përmes një komunikate për media thuhet se kryetari i kuvendit, Kadri Veseli, ka nënshkruar marrëveshje bashkëpunimi me Fondacionin Erst Stiftung, i cili udhëhiqet nga personaliteti i njohur, Erhard Busek.
“Projekti “DEMOS-TI”, i cili ka filluar të realizohet para dy vitesh, ka për qëllim edukimin e moshave të reja lidhur me parlamentarizmin në Kosovë. Me marrëveshjen e re të bashkëpunimit, parashihet që nga 1 tetori i këtij viti, projekti të bëhet tërësisht pjesë e Kuvendit të Kosovës”, thuhet në komunikatë.
Sipas kuvendit ky projekt synon që të përfshijë të gjithë nxënësit e shkollave fillore të Republikës së Kosovës.
Një grup parlamentar prej 9 personave duke përfshirë edhe kryetarin e kuvendit, Kadri Veseli kanë filluar një udhëtim zyrtarë për të lobuar për liberalizimin e vizave.
