Në një nga përballjet më spektakolare të viteve të fundit në kategorinë e peshave të rënda, Daniel Dubois arriti të mbijetojë dy rrëzimeve në ring – e para vetëm pas 10 sekondash – për ta mposhtur Fabio Wardley në raundin e 11-të dhe për t’u shpallur kampion bote për herë të dytë në karrierë.
Lufta nisi në mënyrë dramatike, pasi Wardley e rrëzoi bashkëkombasin e tij britanik me një goditje të fuqishme të djathtë që në sekondat e para të meçit. Ai arriti ta dërgojë Duboisin në dysheme edhe një herë tjetër në raundin e tretë, duke krijuar përshtypjen se triumfi ishte shumë pranë.
Megjithatë, Dubois reagoi fuqishëm. Boksieri 28-vjeçar riktheu kontrollin e duelit me seri goditjesh të rënda dhe presion të vazhdueshëm ndaj kundërshtarit.
Wardley, i cili vinte nga Ipswichi, vazhdoi të luftonte me shumë zemër, pavarësisht dëmtimeve të mëdha në fytyrë. Me hundën e gjakosur dhe njërin sy pothuajse të mbyllur nga ënjtja, ai mezi qëndronte në këmbë, por vazhdonte të kthente goditje.
Ndërsa dueli po bëhej gjithnjë e më i ashpër, arbitri vendosi ta ndërpresë përballjen në raundin e 11-të, duke konsideruar se Wardley nuk ishte më në gjendje të vazhdonte. Pas vendimit, Wardley u ul i dëshpëruar në gjunjë, ndërsa Dubois festoi triumfin dhe fitimin e titullit të peshave të rënda në versionin WBO.
“Ishte një luftë e vërtetë. Faleminderit Fabio për këtë duel. E di që kam zemër të madhe, jam luftëtar,” deklaroi Dubois pas ndeshjes për DAZN.
Me këtë fitore, Dubois regjistroi suksesin e 23-të në karrierën profesionale dhe konfirmoi edhe një herë statusin e tij në elitën e peshave të rënda. Në anën tjetër, Wardley pësoi humbjen e parë pas 22 meçeve si profesionist.
Përballja i përmbushi plotësisht pritshmëritë e tifozëve dhe ekspertëve të boksit, ndërsa promotori Frank Warren konfirmoi se ekziston një klauzolë për revansh mes dy boksierëve.
