Futbollisti drenicas është i ftuar në emisionin “Favorit” në televizionin T7
Taulant Dajaku mendon se gjërat në futbollin kosovar po shkojnë për së mbari.
Mesfushori drenicas beson se futbolli i këtushëm është duke përparuar dhe insiston se kultura në sport është përmirësuar.
Andaj, sipas tij, tash në stadiume të futbollit në Kosovë mund të zbresin edhe familjarë, për t’u argëtuar sadopak duke përcjellë futboll.
“Unë mendoj se ka shumë përmirësime në futbollin e Kosovës për shkak se ka ndërruar niveli i trajtimit të futbollit në përgjithësi. Tash futbollin nuk duhet ta shohim vetëm si një formë argëtimi. Në futbollin kosovar ka ndryshuar shpejtësia e ndërrimit të gjërave. Prej gjërave që e kanë ndërruar për të mirë futbollin kosovar dhe që e kanë ndihmuar që ai të zhvillohet është transmetimi i ndeshjeve direkt. Ne nuk duhet ta shfrenojmë imagjinatën dhe të mendojmë se mund të krahasohemi me ligat e forta, por e krijuam një kulturë sportive dhe një garë korrekte, ku njerëzit mund të shkojnë me familjet e tyre për ta parë një ndeshje futbolli”, ka thënë Dajaku në emisionin “Favorit” në televizionin T7. /Gazeta Express/
