Sekretar i Degës së PDK’së në Prishtinë, Bujar Cakolli i ka replikuar ish-këshilltarit të Kadri Veselit dhe kandidatit të PDK’së deputet, Blerim Latifi, lidhur me konstatimin e tij për komandantët e pasluftës.
Latifi përmes një shkrimi të publikuar dje në Facebook, ka thënë se derisa komandantët bënin gara mes vete se kush e ka xhipin më të shtrenjtë dhe vilat më madhështore, kryeministri Albin Kurti ua lexonte qytetarëve ‘Poemën e Mjerimit’ të Migjenit dhe fitoi sot.
Derisa komandantët bënin garë me njëri tjetrin se kush e ka xhipin ma të shtrenjtë dhe villat më madhështore, Albin Kurti ua lexonte qytetarëve të Kosovës “Poemën e Mjerimit” të Migjenit. Dhe ja ku jemi sot. E bajshi me shnet!”, ka shkruar Latifi në Facebook.
E natyrisht ky postim nuk i ka ikur Cakollit të PDK’së, i cili ka thënë se nuk pajtohet me konstatimet e Blerim Latifit, sipas tij garat për xhipat e vilat më të shtrenjta nuk kanë bërë veç komandantët, por edhe njerëz që nuk kanë pasur lidhje me luftën dhe UÇK’në.
“Qe pse nuk pajtohem në tërësi me këtë konstatim të Blerim Latifit. Garë për xhipa e vila më të shtrenjëta e luksoze nuk kanë bërë veç komandantët, por edhe plotë tjerë që nuk kanë lidhje me luftën edhe UÇK-në, madje as lidhje emocionale. Kam përshtypje sikur kemi krijuar një standard që fajtor për gjithçka të jenë njerzit e luftës, e të tjerët shpeshherë kanë bërë edhe ma zi.Blerim, për me qenë 100% i saktë, duhesh me korigju statusin!”, ka shkruar Cakolli.
Kujtojmë se Blerim Latifi ka hequr dorë nga pozita e këshilltarit të kreut të Partisë Demokratike të Kosovës, Kadri Veseli.
