Kryetarja e Komisionit për Integrime Evropiane, Blerta Deliu, ka marrë pjesë në Konferencën e Komisioneve Parlamentare për Çështjet e Bashkimit Evropian (COSAC), në Bukuresht të Rumanisë, ku ka theksuar çështjen e mosliberalizimit të vizave për Kosovën nga ana e BE’së, shkruan Gazeta Metro.
Deliu është shprehur e kënaqur nga kjo konferencë, derisa ka thënë se Kosova ëshë përfaqësuar në mënyrë të barabartë me të gjitha delegacionet tjera, pavarësisht se Rumania ende nuk e ka njohur vendin.
“Ndonëse Rumania nuk e ka njohur shtetin e Kosovës, delegacioni i Kuvendit u përfaqësua në mënyrë të barabartë me delegacionet e tjera. Si kryetare e Komisionit për Integrime Evropiane, theksova rëndësinë e këtij procesi për Kosovën me kërkesë që dinamika e tij të përshpejtohet”, ka thënë ajo.
Tutje, Deliu ka përmendur edhe përmbushjen e kritereve për viza nga Kosova, dhe mosliberalizimin e tyre nga ana e BE’së.
“Në veçanti potencova faktin që edhe pas përmbushjes së kritereve qytetarët e Kosovës nuk mund të lëvizin pa viza”, shtoi ajo.
Bashkë me Deliun, në konferencë ka marrë pjesë edhe deputeti i Lidhjes Demokratike të Kosovës, Armend Zemaj./gazetametro.net
