Pas një fitoreje spektakolare në ndeshjen e parë në Prishtinë, nënkampioni i Kosovës, Ballkani, ka udhëtuar i motivuar në Maltë ku do të përballet sonte me Floriana FC në stadiumin Centenary në Ta’Qali, në sfidën kthyese të raundit të dytë të UEFA Europa Conference League.
Ballkani, i udhëhequr nga trajneri Orges Shehu, triumfoi me rezultat të thellë 4-2 në ndeshjen e parë, duke shfaqur një performancë dominuese dhe karakter të fortë, sidomos duke marrë parasysh se dy herë u gjend në disavantazh, por arriti të përmbysë gjithçka me katër gola të shënuar.
Në kërkim të konfirmimit në Maltë
Tashmë, kampionët e vitit të kaluar nga Suhareka kërkojnë vetëm një rezultat pozitiv për të siguruar kalimin në rrethin e tretë kualifikues, por ekipi portokalli është i vetëdijshëm se asgjë nuk është e sigurt deri në fishkëllimën përfundimtare. Trajneri Shehu ka vendosur të luajë me një formacion balancues 4-3-3, duke synuar kontrollin e ndeshjes dhe shfrytëzimin e hapësirave që mund të lë skuadra malteze, e cila do të kërkojë përmbysjen e rezultatit.
Formacionet zyrtare:
Floriana FC
Portier: Cioletti
Mbrojtës: Spiteri, Iago Mendança, Lucas Lopez, Gamarra
Mesfushorë: M’Mombwa, D. Vella, J. Grech
Sulmues: Veselji, Jan, Varela
Ballkani
Portier: Galubovic
Mbrojtës: Smajli, Batarelo, Jashanica, Patoku
Mesfushorë: Ard. Deliu, Albert, Giavanni
Sulmues: Tolaj, Adetunji, Kryeziu
Objektivi: kalimi në rrethin tjetër dhe ëndrra europiane
Sfida e sotme nis në ora 20:45 në stadiumin Centenary dhe për Ballkanin paraqet një mundësi të artë për të vazhduar rrugëtimin europian, që vit pas viti po bëhet më serioz për klubin nga Suhareka. Fitorja eventuale do t’i hapte dyert drejt një përballjeje tjetër në rrethin e tretë, me synimin për të arritur për herë të dytë në fazën e grupeve të Ligës së Konferencës. /GazetaExpress/
