Evidentim të shumë shkeljeve, duke filluar nga ato administrative e deri tek ato penale, ka bërë Zyra Kombëtare e Auditimit (ZKA) vit pas viti.
Në raportet e saj institucioni që obligim ligjor e ka auditimin e financave publike, ka gjetur humbje të miliona eurove, keqmenaxhim të miliona të tjerëve, si dhe mungesë të arsyetimit për miliona të tjerë, shkruan sot “Koha Ditore”.
Gjithashtu janë gjetur parregullsi në procesin e prokurimit e në atë të rekrutimit. Por me publikimin e raporteve nga ZKA-ja, trajtimin e tyre nga mediat dhe shoqëria civile duket se përfundon gjithçka.
Shkeljet e evidentuara ligjore nuk janë marr pothuajse asnjëherë parasysh nga institucionet e drejtësisë. Prokuroria e Shtetit nuk ka dhënë as edhe një shembull kur hetime ka hapur pas publikimit të këtyre raporteve.
Ndërkohë që e ulët është edhe përqindja e zbatimit të rekomandimeve të ZKA-së drejtuar institucioneve të audituara, shumica prej të cilave përsëriten vit pas viti. Pothuajse asgjë s’ka bërë në adresimin e shkeljeve të evidentuara as Kuvendi i Kosovës, që është organ mbikëqyrës i Qeverisë dhe institucioneve vartëse të saj.
Edhe këtë vit ZKA-ja në raportet e publikuara gjatë muajit qershor, ministritë dhe agjencitë e pavarura i ka nxjerrë me probleme buxhetore dhe shpenzime të pakontrolluara.
