Një shtetas afgan me motive të dyshuara islamike u dënua me burgim të përjetshëm nga një gjykatë gjermane të martën për vrasjen me thikë të një oficeri policie dhe plagosjen e pesë të tjerëve në një tubim anti-islam vitin e kaluar.
Vendimi vjen në një kohë debati të nxehtë rreth deportimeve të kriminelëve dhe azilkërkuesve të refuzuar në Afganistan, i cili rifilloi në fillim të këtij viti pas bisedimeve me qeverinë talebane, të cilën Berlini nuk e njeh zyrtarisht, shkruan Reuters.
I pandehuri 26-vjeçar, i identifikuar vetëm si Sulaiman A për të mbrojtur privatësinë e tij, u shpall fajtor për përdorimin e një thike të madhe gjuetie për të sulmuar njerëz gjatë një demonstrate në qytetin perëndimor të Mannheimit të organizuar nga grupi anti-islam Pax Europa në fund të majit 2024.
Sulaiman A sulmoi një folës dhe disa demonstrues në këtë aktivitet përpara se të godiste me thikë një oficer policie i cili nxitoi të ndihmonte. Oficeri më vonë ndërroi jetë nga plagët e marra.
Sulmuesi u mor në paraburgim në qershor 2024 pasi doli nga kujdesi intensiv për plagët që pësoi gjatë arrestimit.Edhe pse prokurorët thonë se ai simpatizonte grupin militant të Shtetit Islamik, ai nuk u gjykua për terrorizëm.
