Ka nisur që nga e hëna, regjistrimi i deputetëve të ri të legjislaturës së shtatë të Kuvendit të Kosovës.
Deputetët e ri janë njoftuar me kohë për datat e regjistrimit, ndërsa gjatë kësaj jave, ata do të kryejnë këtë procedurë teknike. Mirëpo, a do t’u sjellë kjo pengesë ministrave aktualë të qeverisë “Haradinaj”?
Zyrtarë të Legjislativit, thonë se regjistrimi nuk detyron gjashtë ministrat: Uran Ismailin, Bedri Hamzën, Pal Lekajn, Endrit Shalën, Abelard Tahirin dhe Kujtim Shalën, të japin dorëheqjet, pak para përfundimit të mandatit.
Sekretari i Kuvendit, Ismet Krasniqi, ka deklaruar se ministrave që kanë marrë statusin e deputetit u lejohet ta bartin postin deri në kohën kur bëhet betimi në seancën konstituive.
Seanca konstituive, deri në zgjedhjen e kryetarit dhe të nënkryetarëve, do të kryesohet nga deputeti më i vjetër, i ndihmuar nga deputeti më i ri, sipas moshës.
“Deputetët kanë nisur të regjistrohen. Për rastin e ministrave kjo nuk prodhon efekt juridik. Pra, ata mund të regjistrohen pasi kjo është vetëm në evidencë të administratës. Ata mund ta kenë postin deri në betim”, është deklaruar ai.
Krasniqi u shpreh optimist se deri të premten, do të përfundojë regjistrimi. Mirëpo, sekretari s’e ka përjashtuar mundësinë që kjo procedurë të vazhdojë edhe javën e ardhshme.
