Sipas një raporti të publikuar nga WorldAtlas, i bazuar në të dhënat e Fondit Monetar Ndërkombëtar (IMF WEO 2025) për GDP-në për kokë banori sipas fuqisë blerëse (PPP), Kosova renditet si shteti i dytë më i varfër në Evropë, menjëherë pas Moldavisë.
Raporti pasqyron nivelin real të standardit të jetesës, gjendjen ekonomike me të cilën përballen qytetarët çdo ditë.
Rritja e çmimeve, pagat e ulëta, emigrimi masiv dhe vështirësitë ekonomike vazhdojnë të mbeten sfida serioze për shumë familje në Kosovë.
Sipas të dhënave të raportit, Moldavia mbetet shteti më i varfër në Europë me GDP për kokë banori sipas PPP-së prej rreth 19,700 dollarësh.
Pas saj renditet Kosova me rreth 20,400 dollarë për kokë banori, e ndjekur nga Ukraina me 21,000 dollarë, Bosnjë e Hercegovina me 22,800 dollarë, Maqedonia e Veriut me 24,300 dollarë, Bjellorusia me 25,500 dollarë, Shqipëria me 25,600 dollarë, Serbia me 28,500 dollarë, Mali i Zi me 31,000 dollarë dhe Bullgaria me 36,000 dollarë.
Raporti thekson se, pavarësisht pretendimeve për zhvillim ekonomik, Kosova vazhdon të mbetet ndër vendet me standardin më të ulët të jetesës në Europë.
Ekonomia mbetet kryesisht e varur nga remitencat, importi dhe konsumi, ndërsa prodhimi vendor dhe investimet strategjike vazhdojnë të konsiderohen të pamjaftueshme.
