Çmimet e naftës u tërhoqën të martën pas rritjes që shënuan një ditë më parë. Nafta u ul me rreth 1.4% në bursa, duke zbritur në 112 dollarë për fuçi.
Iniciativa e re e presidentit Donald Trump, Projekti Liria që filloi të hënën që parashikonte shoqërimin e anijeve të bllokuara në Ngushticën e Hormuzit duket se nuk po jep ndikim të madh në tregjet e naftës. Ajo u prit me sulme të reja iraniane në Gjirin Persik, duke nxitur paqëndrueshmëri në treg.
Sipas raportimeve nuk pati ndonjë rritje të trafikut detar pasi vetëm katër anije kaluan dje ngushticën, në një kohë që para luftës kalonin mesatarisht më shumë se 120 anije në ditë përmes kësaj rruge detare.
Në këtë situatë nuk është shqetësues vetëm çmimi i naftës, por edhe çështja e furnizimit. Inventarët globalë të naftës nuk janë ende në nivele kritike, por ritmi i rënies së prodhimit dhe shpërndarja e pabarabartë nëpër rajone po ngre shqetësime lidhur me mungesat.
Shtetet e Bashkuara duket se nuk janë imune ndaj kësaj krize energjetike, pavarësisht se janë prodhuesi më i madh i naftës në botë. Çmimet e gazit në Amerikë kanë arritur në 4.4 dollarë dhe janë shumë pranë kufirit 5 dollarë nëse bllokimin ne Ngushticën e Hormuzit vazhdon.
Ndërsa disa prodhues, përshirë Arabinë Saudite dhe Emiratet e Bashkuara Arabe kanë gjetur rrugë alternative për eksportet e tyre të naftës.
