Një incident i rëndë ka tronditur finalen e “CVFL Premier Cup” të zhvilluar të dielën, ku ish-futbollisti i njohur Stephen Ireland ka pësuar një dëmtim serioz gjatë pjesës së parë të ndeshjes mes Wythenshawe Vets dhe South Liverpool Vets.
39-vjeçari, i cili gjatë karrierës së tij 13-vjeçare ka luajtur për klube si Manchester City, Aston Villa dhe Stoke City, ishte pjesë e skuadrës Wythenshawe Vets – një ekip i ligës së të dielave që së fundmi është bërë viral për përbërjen e tij me ish-lojtarë profesionistë, shkruan Indeksonline
Ngjarja ndodhi rreth minutës së 30-të, kur Ireland u godit rëndë pas një ndërhyrjeje të ashpër. Pas përplasjes së fortë, ai mbeti i shtrirë në fushë, ndërsa loja u ndërpre menjëherë për t’i dhënë ndihmën e parë mjekësore.
Sipas raportimeve nga vendi i ngjarjes, ambulanca mbërriti pas rreth 30 minutash në stadiumin “Quickline Arena”. Ireland, i rrethuar nga familjarët dhe bashkëlojtarët, mori trajtim emergjent në fushë përpara se të transportohej në spital me autoambulancë.
Mediat britanike raportojnë se ndeshja u ndërpre përfundimisht, ndërsa gjendja e tij mbetet nën monitorim. Bashkëshortja e tij, Jess, reagoi përmes rrjeteve sociale duke falënderuar të gjithë ata që ndihmuan në momentet e vështira.
“Faleminderit të gjithëve që ndihmuan në çdo mënyrë gjatë ndeshjes së sotme. Ishte një moment shumë tronditës, por kujdesi dhe solidariteti bënë një ndryshim të madh”, shkroi ajo, duke falënderuar gjithashtu tifozët e Wythenshawe dhe kundërshtarët e South Liverpool për reagimin e tyre./Indeksonline/
