Në Ditën Botërore të Lirisë së Shtypit, Ambasada Britanike dhe Ambasada e Finlandës në Prishtinë kanë riafirmuar mbështetjen për lirinë e medias në Kosovë.
Në deklaratën e përbashkët thuhet se, në një kohë kur liria e medias është nën sulm në shumë vende të botës dhe dezinformimi po shkatërron besimin dhe debatin demokratik, gazetaria e fortë dhe e pavarur mbetet një e mirë publike jetike.
Sipas ambasadave, një media e fortë dhe e pavarur, që pasqyron zëra të ndryshëm lokal, nënvizon demokracinë, llogaridhënien dhe stabilitetin afatgjatë të Kosovës.
Në reagim theksohet se qasja në informacion të besueshëm mbështet pjesëmarrjen e informuar, besimin në institucionet publike dhe qeverisjen efektive, ndërsa rregullatori medial i Kosovës dhe akterët e shoqërisë civile kanë rol vendimtar në ruajtjen e këtyre parimeve përmes pavarësisë dhe profesionalizmit.
Si bashkëkryetare të Koalicionit për Lirinë e Medias, Britania e Madhe dhe Finlanda kanë deklaruar se do të vazhdojnë të punojnë me partnerët në Kosovë dhe në botë për të forcuar gazetarinë me interes publik dhe për të mbështetur gazetarët që kontribuojnë në një shoqëri të informuar, rezistente dhe gjithëpërfshirëse.
