KB Bashkimi ka dhënë një përgjigje të fuqishme në Prizren, duke mposhtur KB Bora me rezultat 88-73 dhe duke kaluar në epërsi 2-1 në serinë gjysmëfinale të play-offit.
Ndeshja nisi më mirë për mysafirët, me Borën që dominoi në çerekun e parë, duke krijuar epërsi të hershme. Megjithatë, nga çereku i dytë e tutje, Bashkimi ndryshoi rrjedhën e lojës, mori kontrollin dhe u shfaq dukshëm më dominues në parket.
Prizrenasit e ngritën ritmin në fazën ofensive dhe shfrytëzuan më mirë rastet e tyre, duke ndërtuar gradualisht epërsinë që në fund u reflektua në rezultatin përfundimtar 88-73.
Figura kryesore e takimit ishte Shannon Shorter, i cili udhëhoqi Bashkimin me 22 pikë dhe 6 kërcime. Në anën tjetër, më efikasi te Bora ishte Jordan Dingle, që realizoi 25 pikë dhe 6 kërcime, por pa arritur të shmangë humbjen e skuadrës së tij.
Me këtë fitore, Bashkimi merr avantazh të rëndësishëm 2-1 në seri dhe i afrohet një hapi më shumë finales, ndërsa Bora do të kërkojë reagim në ndeshjen e radhës për të mbajtur gjallë shpresat për kualifikim.
