Sulmuesi i krahut të Newcastle United, Anthony Gordon, raportohet se është “i hapur” për të kaluar nga Premierliga në Bundesligë, ndërsa Bayern Munich po intensifikon përpjekjet për të siguruar shërbimet e reprezentuesit anglez.
25-vjeçari është shndërruar në një nga objektivat kryesorë të klubit bavarez, i cili po kërkon të forcojë repartin ofensiv me lojtarë me përvojë të nivelit të lartë në futbollin evropian.
Në javët në vijim, Bayern Munich pritet të zhvillojë takime zyrtare me përfaqësuesit e Gordon për të diskutuar kushtet personale të një marrëveshjeje, sipas “Sky Sport Switzerland”.
Strategjia e klubit gjerman është që fillimisht të arrijë një marrëveshje me kampin e lojtarit, në vend që të hyjë direkt në negociata klub me klub.
Përmes këtij modeli, “Rekordmeister” synon të sigurojë bazat e transferimit para se të kontaktojë zyrtarisht Newcastle.
Sipas raportimeve, Gordon i ka bërë të ditur rrethit të tij të ngushtë se është “i hapur” për një kalim te Bayern, duke e parë këtë hap si një progres të natyrshëm në karrierën e tij. Një faktor i rëndësishëm në këtë qëndrim është edhe shembulli i Michael Olise.
Gordon thuhet se është impresionuar nga mënyra se si ish-lojtari i Crystal Palace u përshtat shpejt në Munich pas largimit nga Premierliga.
Performanca e menjëhershme dhe ngritja e tij në skenën evropiane e kanë bindur Gordon se një rrugë e ngjashme mund të përcaktojë kulmin e karrierës së tij.
Në “St James’ Park”, Newcastle duket se po përgatitet për mundësinë e largimit të Gordon. Edhe pse klubi do të preferonte ta mbante një nga lojtarët kyç, dera nuk është mbyllur plotësisht.
Drejtuesit e Newcastle tashmë kanë nisur të identifikojnë zëvendësues të mundshëm dhe të krijojnë kontakte me disa objektiva, për të mos mbetur të papërgatitur në rast se transferimi realizohet.
Ky qëndrim tregon një lloj pranimi se një ofertë e madhe nga Bayern mund të jetë shumë e vështirë për t’u refuzuar./GazetaExpress/
