Reagimeve të deputetëve lidhur me pasaktësitë e evidentuara në ekspozitën për masakrat në Kosovë, me autor ojq-në Admovere të udhëhequr nga Shkëlzen Gashi, ish-këshilltar i kryeministrit Albin Kurti, deputetja e Lëvizjes Vetëvendosje, Arbëreshë Kryeziu i konsideron “instrumentalizim”.
“Kur më 6 mars, nën patronatin e Kryetares së Kuvendit, u hap ekspozita “Tri ditë që ndryshuan historinë” për Prekazin në shënim të Epopesë së UÇK-së, deputetët e opozitës nuk iu përgjigjën fare ftesës për të marrë pjesë dhe as nuk erdhën në aktivitet. Sot, të njëjtët dalin dhe kërkojnë “llogaridhënie” e vëmendje institucionale. Janë po këta që për 20 vjet në pushtet nuk kanë bërë asnjë hap elementar për dokumentimin e plotë të krimeve dhe masakrave në Kosovë, të njëjtit që kundërshtuan themelimin e Institutit për Krime të Kryera gjatë Luftës në Kosovë”, shkroi ajo në një reagim në Facebook.
Kryeziu tha se qëllimi është “goditja e qeverisë dhe e kryeministrit Albin Kurti”.
“Për vite me radhë kanë folur me shifra të paqarta, pa standard, pa përgjegjësi. Dhe sot, në vend të reflektimit, zgjedhin zhurmën dhe sulmin. Kjo tregon qartë se qëllimi nuk është drejtësia, kujtesa institucionale apo kujdesi ndaj viktimave dhe familjarëve, por goditja e qeverisë dhe e kryeministrit Albin Kurti”.
“Ky është oportunizmi i tyre, instrumentalizimi i çdo gjëje, madje edhe i dhimbjes tonë më të madhe sa për të dhënë një goditje ndaj kundërshtarëve politikë”, shkroi ajo.
Integra dhe Admovere, dy organizatat autore të ekspozitës me pasaktësi për masakrat që kanë ndodhur gjatë luftës në Kosovë, kanë kërkuar falje në një reagim sot në mëngjes.
Ekspozita, e cila ngjalli indinjatë të gjerë në Kosovë, me Komunën e Prishtinës që e revokoi lejen për shfaqjen e saj, doli se ishte financuar edhe nga Kuvendi i Kosovës.
Shkëlzen Gashi tha dje se për të dhënat e masakrave janë mbështetur në listën e të vrarëve nga “Libër Kujtimi i Kosovës” i Fondit për të Drejtën Humanitare në Kosovë (HLC) organizatë e udhëhequr nga Natasha Kandiq, aktivisttja serbe për të drejtat e njeriut.
Por Fondi për të Drejtën Humanitare tha në një reagim se të dhënat e paraqitura të ekspozitë në disa raste japin pasqyrë të pasaktë të krimeve dhe kjo nuk ka të bëjë me çështje interpretimi, por “me mungesë elementare të njohurive mbi të drejtën ndërkombëtare humanitare, faktet e vërtetuara në gjykatë dhe mënyrën e leximit të të dhënave”.
