Njësia e Trafikut të Kryeqytetit duke filluar nga dita e hënë, është duke ndërmarrë një plan të veçantë operativ të fokusuar te motoçikletat, me qëllim rritjen e sigurisë në komunikacion, parandalimin e aksidenteve dhe respektimin e rregullave të trafikut.
IndeksOnline ka siguruar pamje nga aksion i policisë i zhvilluar në rrugën ‘UÇK’ në Prishtinë, e ku shihen disa motoçikleta të ndaluara për verifikim nëse pajisen me dokumente të nevojshme për qarkullim në trafik.
Policia njofton se gjatë dy ditëve të para të zbatimit të këtij plani, zyrtarët policorë kanë ndërmarrë një sërë masash ndaj drejtuesve të motoçikletave për kundërvajtje të ndryshme në trafik, përfshirë shkeljet e rregullave të komunikacionit, mungesën e dokumentacionit përkatës, si dhe mosrespektimin e masave të sigurisë.
Njësia e Trafikut e Kryeqytetit bën të ditur se ky plan operativ do të vazhdojë edhe në ditët në vijim, andaj apelon tek të gjithë drejtuesit e motoçikletave që të respektojnë rregullat e trafikut, të përdorin pajisjet mbrojtëse, si dhe të kontribuojnë në rritjen e sigurisë së përgjithshme në rrugë. /IndeksOnline/
