Zhurma mbetet shkaku kryesor i mosmarrëveshjeve, ndërsa problemet me hapësirat e përbashkëta dhe duhanin renditen menjëherë pas.
Edhe pse jeta në Zvicër konsiderohet përgjithësisht e qetë dhe e rregullt, konfliktet mes fqinjëve nuk mungojnë. Sipas një studimi të ri nga platforma e pasurive të paluajtshme Immoscout24, rreth 15 për qind e banorëve përjetojnë shpesh ose shumë shpesh mosmarrëveshje me fqinjët e tyre, përcjell albinfo.ch.
Studimi tregon se shkaku më i zakonshëm i këtyre konflikteve është zhurma, e përmendur nga 45 për qind e të anketuarve. Pas saj vijnë çështje të tjera të përditshme, si përdorimi i lavanderive të përbashkëta (18 për qind), duhani (17 për qind) dhe papastërtia apo mbeturinat në hapësirat e përbashkëta (16 për qind).
Ndërkohë, tema si kopshtaria apo organizimi i skarave (barbecue) rezultojnë të kenë shumë më pak potencial për të shkaktuar konflikte mes fqinjëve.
Gjetjet e studimit tregojnë se edhe në një vend të njohur për rend dhe disiplinë si Zvicra, bashkëjetesa në komunitet mbetet një sfidë për një pjesë të konsiderueshme të popullsisë. /Albinfo.ch
