Ministria e Energjisë e Arabisë Saudite njoftoi se ka pezulluar pjesërisht operacionet në rafinerinë masive të naftës, Ras Tanura, pas një sulmi që shkaktoi zjarr në objekt.
Objekti Ras Tanura, i vendosur përgjatë bregdetit lindor të Arabisë Saudite në Gjirin Persik, është një nga rafineritë më të mëdha në Lindjen e Mesme dhe një shtyllë e sektorit të energjisë në këtë vend.
Kapaciteti i saj ditor i rafinimit arrin në 550.000 fuçi naftë.
“Disa njësi operative të rafinerisë u mbyllën si masë paraprake. Kjo nuk ndikon në furnizimin e tregjeve me produkte nafte”, tha një burim zyrtar në Ministrinë e Energjisë në një deklaratë të publikuar nga Agjencia zyrtare e Shtypit Saudit.
Më herët, agjencia AFP, duke cituar një “burim të informuar”, tha se se Ras Tanura ishte sulmuar dhe ishte në flakë.
Flaka më vonë u vu nën kontroll.
Sipas një zëdhënësi të Ministrisë së Mbrojtjes në Arabinë Saudite, rafineria u shënjestrua nga dy dronë, të cilët u kapën dhe u shkatërruan.
Ras Tanura është një nga portet më të mëdha të naftës në botë.
