Shërbimi Korrektues i Kosovës njofton se sot rreth orës 03:10, nga QKUK-ja është arratisur i burgosuri F.M.
I dënuari në fjalë është hospitalizuar më datë 16.02.2026 nga Qendra Korrektuese në Dubravë në QKUK, në repartin e Onkologjisë, kati i dytë, dhoma nr. 2, së bashku me pacientë të tjerë.
I njëjti është i dënuar për Veprën Penale “Vjedhje e Rëndë”.
Ai ishte arrestuar më 24 tetor të vitit të kaluar, është duke mbajtur dënimin me burgim në kohëzgjatje prej 4 vitesh dhe do të lirohej më 08.06.2029.
“Menjëherë pas rastit, është njoftuar Policia e Kosovës dhe është themeluar komision i brendshëm hetimor administrativ për të shqyrtuar rrethanat e arratisjes dhe dyshimet për shkelje eventuale nga zyrtarët korrektues që kanë qenë përgjegjës për sigurinë dhe prezencën e tij” thuhet në njoftimin e Shërbimit Korrektues.
Nga SHKK-ja bëjnë me dije se komisioni disiplinor, si masë e menjëhershme, ka pezulluar nga puna dy zyrtarë korrektues deri në përfundim të procedurave hetimore.
“Pas pranimit të raportit nga komisioni hetimor, Shërbimi Korrektues i Kosovës do të ndërmarrë masat përkatëse në përputhje me gjetjet dhe rekomandimet që do të dalin nga ky proces” thuhet në njoftim.
