Oda e Avokatëve të Kosovës ka njoftuar se në disa raste dhe në disa objekte të Policisë së Kosovës, kanë vërejtur pajisje incizimi që në dukje ngjasojnë me kamera artizanale, të vendosura në hapësirat ku zhvillohen intervistat dhe konsultat konfidenciale ndërmjet avokatëve dhe palëve.
Kësisoj, duke e konsideruar këtë situatë si rrezik të drejtpërdrejtë për standardet e konfidencialitetit, Oda e Avokatëve ka ndërmarrë menjëherë veprimet institucionale dhe ka kërkuar sqarim zyrtar nga Policia e Kosovës.
Me këtë rast është sqaruar se ato janë instaluar tri vite më parë, por se nuk përbëjnë pajisje të fshehta dhe nuk janë të funksionalizuar për incizim.
Postimi i plotë:
NJOFTIM I RËNDËSISHËM PËR AVOKATË
Gjatë ushtrimit të detyrës së tyre si avokatë, Kryetari i Odës së Avokatëve të Kosovës, Besnik R. BERISHA dhe Nënkryetari, Naim Rudari, në disa raste dhe në disa objekte të Policisë së Kosovës, kanë vërejtur pajisje incizimi që në dukje ngjasojnë me kamera artizanale, të vendosura në hapësira ku zhvillohen intervistat dhe konsultat konfidenciale ndërmjet avokatëve dhe palëve.
Duke e konsideruar këtë situatë një rrezik të drejtpërdrejtë për standardet e konfidencialitetit dhe të drejtave procedurale, Oda e Avokatëve të Kosovës ka ndërmarrë menjëherë veprimet institucionale dhe ka kërkuar sqarim zyrtar nga Policia e Kosovës.
Në përgjigjen e saj, Policia ka njoftuar se pajisjet:
- Janë instaluar rreth tre vite më parë si pjesë e një projekti zyrtar për sistemet audio/video në dhomat e intervistimit;
- Nuk përbëjnë pajisje të fshehta, ilegale apo të menaxhuara nga stafi hetues;
- Nuk janë funksionalizuar dhe nuk kanë gjeneruar asnjë incizim;
- Janë vendosur në kuadër të një projekti të koordinuar me institucionet kompetente.
Megjithatë, Oda e Avokatëve vlerëson se prania e pajisjeve që në dukje ngjasojnë me kamera artizanale, pa shenja të dukshme identifikuese, pa sinjalizim teknik dhe pa njoftim paraprak, krijon pasiguri të justifikuar dhe bie ndesh me standardet e konfidencialitetit që garantojnë ushtrimin e profesionit të avokatit.
Për këtë arsye, OAK u bën thirrje të gjithë avokatëve që të jenë maksimalisht vigjilentë dhe të mos zhvillojnë konsultime konfidenciale në hapësira ku ekziston dyshim mbi sigurinë teknike apo privatësinë e bisedës, pavarësisht përgjigjes së dhënë nga policia..
Oda e Avokatëve të Kosovës mbetet e përkushtuar ndaj mbrojtjes së standardeve profesionale të avokatëve, të drejtave procedurale të palëve dhe garantimit të kushteve të sigurta e të pandryshueshme të konfidencialitetit në të gjitha hapësirat e intervistimit./Lajmi.net/
