Kryetari aktual i Komunës së Junikut dhe njëherësh kandidat i Lidhjes Demokratike të Kosovës për një mandat të ri, Ruzhdi Shehu, ka njoftuar për vazhdimin e punimeve infrastrukturore në qytet, duke theksuar se puna për përmirësimin e rrugëve po ecën me ritme të qëndrueshme.
“Sot kemi vazhduar me asfaltimin e rrugëve në lagjen ‘Berishë’. Nga dita e hënë do të vazhdojmë edhe me asfaltimin e rrugëve të mbetura në të gjitha lagjet e Junikut”, ka shkruar Shehu në Facebook.
Ai ka theksuar se në vetëm katër vite qeverisjeje, Juniku ka ndryshuar ndjeshëm në aspektin infrastrukturor, duke e krahasuar me periudhën e qeverisjeve të mëhershme.
“Gjatë 12 viteve të qeverisjes së kaluar, Juniku ka stagnuar në çdo aspekt sepse nuk ka pasur investime serioze. Ndërsa për vetëm 4 vite të qeverisjes sonë, infrastruktura rrugore e Junikut është kompletuar dhe ka marrë formë moderne”, ka shtuar ai.
Në fund, Shehu uroi qytetarët për përfundimin e një tjetër projekti të rëndësishëm:
“Urime Junikut dhe të gjithë junikasve”, ka shkruar ai.
