Buxheti për vitin 2026 po diskutohet aktualisht në Bundestag. Propozimi i buxhetit i Ministrit të Financave dhe Zëvendëskancelarit, Socialdemokratit Lars Klingbeil, do të debatohet për rreth dy muaj dhe deputetët duhet ta miratojnë atë në fund të nëntorit.
Është tashmë e qartë se diskutimet nuk do të jenë të lehta. Shumë institucione shtetërore do të duhet të funksionojnë me buxhete dukshëm të reduktuara, sepse të ardhurat nga taksat nuk janë as afër mjaftueshëm për të mbuluar shpenzimet shtetërore, shkruan Deutsche Welle.
Në fillim të debateve për buxhetin, Klingbeil foli për kohë të vështira dhe njoftoi “vendime të guximshme dhe pjesërisht jopopullore”. Megjithatë, Ministria Gjermane e Transportit nuk priste që kursimet buxhetore do t’i preknin edhe ata.
Restaurimi i infrastrukturës së rrënuar ka një përparësi absolute. Qeveria kohët e fundit miratoi një fond të posaçëm për infrastrukturën dhe mbrojtjen e klimës me vlerë 500 miliardë euro, të financuar nga huamarrje të reja. “Vendi ynë ka kursyer shumë në vendet e gabuara. Ne duam që ekskavatorët të vihen në punë shpejt”, thotë Ministri i Financave Klingbeil.
Ministri i Transportit Patrick Schnieder i Unionit Kristian Demokrat priste që ministria e tij të përfitonte ndjeshëm nga fondi.
Aurostradat në Gjermani shtrihen për rreth 13,200 kilometra. Sipas të dhënave nga Ministria Federale e Transportit, gjysma e tyre kanë dëmtime. Nëse shtohen rrugët federale, konsiderohet se nevojitet rehabilitim për rreth 25,000 kilometra. Situata me urat e autostradave është edhe më serioze – rreth 5,000 ura duhet të riparohen ose rindërtohen urgjentisht. Rrjeti hekurudhor i Deutsche Bahn është aq i rrënuar sa vetëm çdo tren i dytë arrin në kohë.
Për vitin aktual buxhetor, Klingbeil ka ndarë pothuajse 12 miliardë euro nga fondi për Ministrinë e Transportit. Në vitin 2026, duhet të ndahen deri në 21 miliardë. Megjithatë, Ministri Schnieder sigurisht nuk priste që Klingbeil do ta zvogëlonte njëkohësisht buxhetin bazë të Ministrisë së Transportit me 10 miliardë, në një total prej 28 miliardë eurosh.
Edhe pse Klingbeil pretendon se kjo nuk “mbulon boshllëqet” në buxhet, opozita e kritikon ashpër këtë veprim. Konkretisht, qeveria premtoi se fondet do të ndahen nga fondi ekskluzivisht për investime shtesë.
Ministri i Transportit është i indinjuar, jo vetëm për shkak të buxhetit të reduktuar, por edhe sepse aftësia e tij për të investuar është gjithashtu e kufizuar. Vetëm rehabilitimi i urave që nuk mund të riparohen mund të financohet nga fondi special, por jo autostrada të reja ose të zgjeruara.
Për këtë përdoret buxheti bazë. Por, siç thotë Schnieder, buxheti i tij tani i reduktuar nuk është më i mjaftueshëm për këtë. “Na mungojnë rreth 15 miliardë euro për periudhën nga viti 2026 deri në vitin 2029”, tha Schnieder në një intervistë me Frankfurter Allgemeine Zeitung (FAZ).
Për shkak të kësaj, 74 projekte ndërtimi dhe zgjerimi autostradash dhe 99 projekte federale rrugore, megjithëse të planifikuara tashmë, do të duhej të pezulloheshin dhe shtyheshin. Kryesisht bëhet fjalë për bashkimin e autostradave ekzistuese dhe ndërtimin e rrugëve anësore.
