Dy sindikata të mësuesve të sistemit arsimor të Universitetit të Kalifornisë (UC) kanë paditur administratën e presidentit amerikan, Donald Trump, për ngrirjen e fondeve federale dhe veprime që, sipas tyre, synojnë të shtypin lirinë akademike.
Padia, e paraqitur në Gjykatën Rajonale të SHBA-së për Qarkun Verior të Kalifornisë, është bërë nga njëzet e një grupe që përfaqësojnë më shumë se 100 mijë punonjës. Përfaqësuesit e tyre pretendojnë se administrata po përpiqet të kufizojë të drejtat e institucioneve arsimore përmes presionit financiar.
Sipas padisë, synimi është të ndalohet qeveria nga përdorimi i kërcënimeve financiare kundër sistemit, të cilat konsiderohen të dëmshme dhe të paligjshme. Gjithashtu, kërkohet rikthimi i fondeve që tashmë janë pezulluar, raporton The Guardian.
Në dokument thuhet se administrata e Trump po përpiqet të marrë nën kontroll menaxhimin e përditshëm të UC-së “përmes shtrëngimit, duke kërcënuar me shkurtimin e 17 miliardë dollarëve në financim vjetor federal për sistemin nëse nuk i bindet kërkesave të saj”.
Gjithashtu, padia thekson se kërcënimet bazoheshin në “përçmimin ndaj programeve mësimore të institucioneve, aktiviteteve ekspresive në kampuse dhe nismave për diversitet, barazi dhe përfshirje”.
