Klubi nga Gjilani, Drita, ka shkruar histori sonte duke siguruar për herë të parë pjesëmarrjen në fazën e grupeve të UEFA Conference League, pas një performance të shkëlqyer në përballjet ndaj skuadrës luksemburgase Differdange.
Në ndeshjen e dytë të “play-off”-it, e cila u zhvillua sonte në Luksemburg, Drita arriti një fitore të ngushtë por të vlefshme me rezultat 0:1. Goli i vetëm i takimit u shënua nga Besnik Krasniqi nga penalltia në minutën e 62-të, duke i dhënë avantazhin vendimtar skuadrës kosovare, transmeton lajmi.net
Kjo fitore, në kombinim me rezultatin 2:1 në ndeshjen e parë të zhvilluar në Kosovë, e çon Dritën tutje me rezultat të përgjithshëm 3:1, duke siguruar për herë të parë pjesëmarrjen në grupet e Conference League.
Edhe pse nuk është ekipi i parë nga Kosova që arrin këtë sukses (Ballkani ka qenë më herët dy herë në fazën e grupeve të kësaj gare), Drita bëhet skuadra e dytë nga vendi që përfaqëson Kosovën në një kompeticion të tillë evropian, duke shënuar një moment historik për klubin dhe për futbollin kosovar.
Me këtë sukses, Drita tregon potencialin dhe rritjen e nivelit të futbollit kosovar në skenën ndërkombëtare, duke fituar edhe më shumë respekt e vëmendje në arenën evropiane./lajmi.net/
